لعنة الجمال// الشاعر السيد حسن
لعنة الجمال
*********
كان ياما كان
حكاية من زمان للزمان
مش خيال وبرضه الآن
قمر مش زي اللي بنشوفه
حاجه كده فوق الوصف والإمكان
نجوم حواليها بيسبحوا بجمالها
ودلالها شرع متبوع
ومن الإيمان
ممنوعة من القسوة
خضرة جذورها المحبه
وفروعها الأمان
عجيبه وصبية في حب الغير
وبتعشق بجنان
اتصيغت بالبوادي
ورضعت من النيل
ومطر الرحمن
بتحب تغريد الجرس والآذان
دوحة آسيل وصبار
ورمان من جنة الرضوان
كلامها مدرسة
وجامعة للبيان
للظلم ما تلين
ولا تنحني لجبان
لما تصحى تصحى الدنيا معاها
الكون بصباحها يزدان
تتبارك الحياة ببركتها
دا خيرها سلة الزمان
رفيف الشجر غناها
ودندنتها وتر سهران
دارت الرحايا عليها
واتراهنوا على الفناء
أو التوهان
في دوامة النسيان
بقت حكاية على كل لسان
حتى التاريخ وقف فترة محتار
يلون صفحتها بأي ألوان
بسم الله نبدأ الحكاية
للعبرة والتأمل مش للتسلايه
صبية مش غجرية
ولا راهبة ولا مرازية
مابتحبش الخلخال
والزينة طبيعية
مرسومة بإبداع رباني
وبتبلع القسية
عشاق كتير رايدنها
متجاهلين اللي شاغلها
معذورين أصل الفارس
هاجرها
العمر أربع تلاف
والقدم جملها
سلسلة من العشاق
دابوا في محاسنها
لكن قلبها الهرمي
قال وهيفضل يقول
مش راح يفتح بابه
إلا للأسمر شبيه أبو الهول
غير كده غير مقبول
عهد وخداه الصبيه
والحر عليه الوعد دين
لازم يوفيه ده من الدين
قدم الجدع المهر
كتير بالروح
وكتير بشرب المرار
أصله عنيد
والمرار بيزيده إصرار
ساعات يكون عنتر
وساعات أبو زيد
وساعات يكون هيثم
وابو سويلم ولبيد
جد وجدع وابن بلد وبيه
بيحب الغالية والحلوة
مش ليه
آدي الجدع في غربته
شايل همومه على اكتافه
الروح مع القمر الحزين
والجسم انحنى وشاخ
دواه نسمة عصاري
ومداعبة ورد النيل
دواه الجلابيه والبيجامه
ويوم ينكسر لجامه
والأموره الصبيه
إللي إسمها مصريه
شقرة وقمحيه
بتحب المناغشه
وتموت في الملاغيه
كليوباترا وليلى
وصابره وبهيه
مستنيه
حطه الصحرا على خدها حلم
تشوفها بالندى متوضيه
بتنزف عينيها السنين
تتصبر بالانتظار
وبالدعاء أمل الشقيانين
ولحين ما يرجع الفتى
ويتلم شمل الحبيبين
يالا نرسم بدايه
لبداية البدايه
لنا والسامعين
ما تقولوا آمين
الشاعر السيد حسن....
تعليقات
إرسال تعليق